SERBSKA HUDŹBA A SŁUCHOHRY
Serbska pišćelowa hudźba
Organist Stefan Kießling
Stefan Kießling (*1979) je swobodnje skutkowacy koncertowy organist. Wopytawši Choćebuski Delnjoserbski gymnazij skutkowaše mjez druhim 15 lět jako organist při Serbskej cyrkwi w Choćebuzu. Za předležacu CDju je zestajił pišćelowe twórby serbskich komponistow, načasnych kaž prjedawšich. Z tym nastanje jónkrótny přehlad tohole hudźbneho žanra. Předstajeja so twórby Korle Awgusta Kocora, Georga Böhma (partita na kěrluš Jana Krygarja), Ulricha Pogody, Feliksa Brojera, Jana Cyža a Jana Pawoła Nagla. Nahrawało je so w Lipšćanskej katolskej propstowskej cyrkwi swjateje Trojicy.
Po łužiskich pućach
Released Sounds Trio: Melodije z Kraloweho huslerskeho spěwnika
Kralowy huslerski spěwnik je zběrka ludowych melodijow z kónca 18. lětstotka a z tym najstarši notowy zapisk serbskeje ludoweje hudźby. Předležaca CD z wubranymi melodijemi słuži dalšemu wotkrywanju a popularizowanju tohole jónkrótneho žórła. Pólski hudźbnik, komponist a hudźbny etnologa Maciej Rychły je zestajił 13 titlow spěwnika. Z wužiwanjom wosebitych instrumentow kaž tradicionelnych pastyrskich pišćałkow, psalteriuma, gitary Stauffera, mandole, akordoweje citery a měchawki (małych serbskich dudow) nastawa swojorazna interpretacija starodawneje serbskeje ludoweje hudźby.
Nowa Doba – Stara Šula
serbski hip-hop
“Słyš, ludo serbski, nowa doba kiwa!”, přiwoła młoda skupina Nowa Doba swojemu připosłucharstwu a čitarstwu. Florian Kießlich (FloJ), Pětr Dźisławk (Lil Handrij) a Syman Hejduška (SMAN) su 13 nowych titlow, zdźěla z wužićom staršich spěwow (sampling) za prěni serbski hip-hop-album produkowali. Při tym podpěrali su jich hosćo kaž spěwarka Greta Čórlichec, skupiny Trojozynk, Přezpólni a Wólbernosće, rěčnik Beno Bělk a mnozy dalši.
Kikerahi 2
Serbske dźěćace spěwy
Spěwnik z CD “Kikerahi, biło je tři” wuńdźe hižo lěta 2004, tola tež dźensa hišće so rady kupuje. Nětko je Leńka Thomasowa dalšich 33 titlow spěwnika za druhu cejdejku zestajiła, z kotrychž so 18 spěwčkow instrumentalnje wobdźěła a nowo nahrawa. Na tym sobu skutkowali su dźěći serbskich pěstowarnjow z Budyšina, Chrósćic, Malešec, Rownoho a Worklec kaž tež šulerjo SZŠ Budyšin a horta Pančicy-Kukow. Nowum je, zo su so přidali wšitke 33 playbackow prěnjeje a druheje cejdejki, kotrež su z pomocu Załožby za serbski lud nowe nastali. Dźěćom, wosebje předšulskim, ale tež staršim a kubłarkam předleži z tym spodobny a wšelako wužiwajomny zynkonošak.
Rjana Łužica
Serbska hymna
Na zynkonošaku předstaja so serbska hymna w hornjoserbskej, delnjoserbskej a němskej wersiji. Nahrawało je so nowe wobdźěłanje Oksany Weingardt za mały komorny orchester ze studentami Drježdźanskeje Wysokeje šule za hudźbu “Carl Maria von Weber” a dalšimi hudźbnikami. Jako spěwarja-solista słyšiće Geralda Schöna. CD pak nima serbsku hymnu jenož dokumentować, ale tohorunja do spěwanja pohnuwać; tuž namaka zajimc na njej tež instrumentalnu wariantu.
Bjarnat Krawc
Klawěrna hudźba – Erika le Roux
Předležaca edicija prezentuje wšitke wažne twórby klawěrneje hudźby Bjarnata Krawca. Nahrawanja złožichu so na wědomostnje připrawjeny notowy zwjazk samsneho titla, kiž wuńdźe w lěće 2018. Předleži z tym zhromadźene tworjenje Krawca za klawěr w notach a na zynkonošaku. Znata pianistka Erika Le Roux postara so wo interpretaciju z wysokim wuměłskim narokom.
Spěwy Korle Awgusta Kocora
Tři spěwy ze zběrki
WĚNC NARODNYCH SPĔWOW HORNJO-A DELNJOŁUŽISKICH SERBOW Z PŘEWODOM FORTEPIANA WOT K. A. KOCORA
Oratorij Hrodźišćo
Zhromadny projekt Serbskeho ludoweho ansambla a 1. serbskeje kulturneje brigady
Z oratorijom „Hrodźišćo” poradźi so Měrćinej Weclichej to štož je sej dawno hižo předewzał, mjenujcy komponować oratorij za wšitke generacije. Je to po rockowym oratoriju „Wětrnik a časy”, kiž swjećeše w lěće 2006 premjeru, hakle jeho druha wobšěrniša twórba. Wona nasta w štyri dźělach a klinči cyle za Měrćinom Weclichom. Wobsahowje wopisuje wona pućowanje Słowjanow před 1300 lětami. Na teksty za cyłkownje 15 spěwow twori Weclich hudźbu. A to po jeho začuću a poćahujo so na hrodźišća słowjanskich prjedownikow.
Klawěr & brewěr
Měrćin Weclich
Měrćin Weclich předstaja nam z tutej CDju swój brewěr; wuběr spěwow a baladow poslednich třiceći lět swojeho tworjenja. Brewěr wopřijima znate a woblubowane title, kotrež wšelakorosć zabawneho hudźbneho žanra we wšej pisanosći špiheluja. Nastał je tak portret mnohostronskeho spěwarja-komponista, kiž zamóže swój publikum tež dźensa hišće wot młodeje hač do stareje generacije pohnuwać a zahorić.
Carpe noctem – Njeskónčna nóc
serbska popowa opera
Hudźbno-dramaturgiske dožiwjenje Serbskeho młodźinskeho towarstwa Pawk z.t. a hudźbneho kolektiwa “Trio a Kumple” w septembrje lěta 2021. Čerstwe spěwy a klasikarje młodych serbskich hudźbnikow přewodźuja jimacu stawiznu młodeju čłowjekow, kotrajž wobaj na swoje wašnje po nocach za prawym žiwjenjom pytataj.
Serbska rapsodija
Komorna hudźba za wiolinu a klawěr
Nowe wudaće serbskeje komorneje hudźby wobsahuje twórby Bjarnata Krawca, Jurja Winarja, Jana Rawpa a němskeho komponista Huga Raithela. Zestajichu so kompozicije, kotrež su dźensa lědma hišće znate; abo popularne ale hižo njepřistupne. Nowšej twórbje Jana Thiemanna a Ulricha Pogody wuběr wudospołnjetej. Wo mištersku interpretaciju postaratej so Anett Baumann (wiolina) a Liana Bertókowa (klawěr).
Serbska Reja – Traditional Sorbian Dance Music
Tradicionalna serbska rejowanska hudźba
Towarstwo Serbska reja předstaja na tutej CDji melodije zašłych třista lět, pochadźace ze serbskeje Łužicy. Někotre su dźensa derje znate jako ludowe spěwy, druhe su so drje něhdy raz napisali, ale hižo dołho do rejki njepiskali.
Swět za durjemi
Słuchohra za swójbu
Tajkile njewšědny wopyt! Předstajiće sej: Mała Měrka je pola wowki a chce, zo jej ta hišće bajku dopowěda. Mać praji, zo leži wowka w komje a zo to njepóńdźe. Tola jako wočini Měrka durje spanskeje, je nadobo w cyle hinašim swěće.
Hory módre,
ja was znaju
Woblubowane serbske spěwy
Złožujo so na nahrawanja Serbskeho rozhłosa je Šćěpan Brankačk zestajił rjad spěwow, kiž (nimale) kóždy znaje, kiž su so w běhu lět w najlěpšim zmysle słowa z ludowymi stali a dušu hrěja.
MDR SERBJA 2018 – Hej Łužica
Sebska popularna hudźba
Serbski rozhłós je z podpěru Załožby za serbski lud nowu CD ze serbskej popularnej hudźbu wudał.
